மருத்துவர் ஜே.எச்.கிளார்க்

 

மருத்துவர் ஜே.எச்.கிளார்க்

(JOHN HENRY CLARKE)

 பிறப்பு: AD 1853

இறப்பு : 24/11/1931

 

 

இங்கிலாந்து நாடு ஹோமியோபதி உலகிற்கு தந்த மிகச் சிறந்த மருத்துவர் ஜே . எச். கிளார்க் . இவர் கி.பி. 1853 இல் பிறந்தார். அளப்பரிய ஆற்றலும் , மதி நுட்பமும் கொண்ட இவரைச் சந்தித்த ஒவ்வொருவரும் இவருடையத் தனித்தன்மையையும் , மனித நேயத்தையும் மறக்கவே மாட்டார்கள். இவர் கி.பி. 1875 இல் எடின்பரோ ( EDINBURGH) பல்கலைக்கழகத்தில் M.B.C.M.,  பட்டம் பெற்றார். மேலும் தொடர்ந்து படித்த மருத்துவர் கிளார்க் கி.பி. 1877 இல் பட்டத்தையும் பெற்றார். தமது சிறப்பான மருத்துவச்  சேவையின் மூலம் கொடிகட்டி பறக்க ஆரம்பித்தார். 

 

 இவர் மிகச் சிறந்த ஹோமியோபதி மருத்துவர் காம்டன் பர்னேட்டின் ( DR.COMPTON BURNETT AD 1840-1901) தீவிர ஆதரவாளர். அப்பொழுது இங்கிலாந்திலிருந்து வெளிவந்த ” THE HOMEOPATHIC WORLD” என்ற பத்திரிக்கையின் ஆசிரியராக இருந்த காம்டன் பர்னேட் கி.பி. 1885 ஆம் ஆண்டு ஏப்ரல் மாதம் அந்தப் பதவியிலிருந்து விலகியவுடன், அப்பொறுப்பை மே 1885 இல் கிளார்க் ஏற்றுக் கொண்டார். அன்றிலிருந்து ஏறத்தாழ 29  ஆண்டுகள் அப்பத்திரிக்கையின் ஆசிரியராக பணியாற்றியுள்ளார். அன்றைய காலகட்டத்தில் இங்கிலாந்தில் ஹோமியோபதி மருத்துவம் செய்வதில் இருந்த தடைக்கற்களை மருத்துவர் ஜே.எச்.  கிளார்க்கின் எழுத்தாற்றல் மாற்றியமைத்தது என்றால் அது மிகையாகாது.

 

 கி.பி. 1895  இல் கிளார்க் அவர்களின் “ DICTIONARY OF MATERIA MEDICA” மற்றும் “ CLINICAL REPERTORY” என்ற இரண்டு புத்தகங்களும் வெளியாகின. இதனைத் தொடர்ந்து பல புத்தகங்களையும் , அறிவியல்/ ஹோமியோபதி ஆய்வு கட்டுரைகளையும் எழுதி வெளியிட்டார். மருத்துவர் கிளார்க் எழுதிய முக்கியமான நூல்கள் கீழே கொடுக்கப்பட்டுள்ளன. 

 

1.       CATARRH, COLDS AND GRIPPE.

2.       CHOLERA, DIARRHEA AND DYSCENTERY.

3.       CONSTITUTIONAL MEDICINES.

4.       DECACHORDS.

5.        DISEASES OF THE HEART ABD ARTERIES.

6.       GRAND CHARACTERISTICS OF MATERIA MEDICA.

7.       DICTIONARY OF MATERIA MEDICA.

8.       CLINICAL REPERTORY.

9.       GUNPOWDER AS A WAR REMEDY.

10.    HAEMORROIDS AND HABITUAL CONSTIPATION.

11.    HOMEOPATHY EXPLAINED.

12.    INDIGESTION, ITS CAUSES AND CURE.

13.    NON-SURGICAL TREATMENT OF DISEASES OF GLANDS.

14.    ORGANON OF MEDICINE

15.    RADIUM AS AN INTERNAL REMEDY.

16.    REVOLUTION IN HOMEOPATHY.

17.    THERAPEUTICS OF CANCER.

18.    WHOOPING COUGH.

19.    THE PRESCRIBER.

 

 

இவரது படைப்புகளில் சில புத்தகங்கள் ஸ்பானிய மற்றும் ஜெர்மானிய மொழிகளிலும் வெளியிடப்பட்டன. இவரது எழுத்தாற்றலும் விஞ்ஞான நுட்பமும் ஹோமியோபதி வளர்ச்சிக்குப் பெரிதும் உதவி உள்ளதென்றால் அது மிகையாகாது. குறிப்பாக, மூன்று தொகுதிகளாக வெளியிடப்பட்ட  இவரது “DICTIONARY OF MATERIA MEDICA” என்ற மருந்தியல் களஞ்சியம் உலகம் முழுவதும் உள்ள ஹோமியோபதியர்களை மிகவும் கவர்ந்தது.

 

மாமேதை ஹானிமனின் படைப்புகளுக்குப் பிறகு , ஹோமியோபதி உலகம் கண்ட முகச் சிறந்த புத்தகங்களாக மருத்துவர் ஜே.எச்.கிளார்க்கின் " “DICTIONARY OF MATERIA MEDICA” என்ற மருந்தியல் களஞ்சியமும், மருத்துவர் ஜே.டி. கெண்ட் ( AD 1849-1916) எழுதிய” REPERTORY OF MATERIA MEDICA”  என்ற மருந்துகாண் ஏடும் போற்றப்படுகின்றன. இங்கிலாந்தில் ஜே.எச்.கிளார்க் என்றால் அமெரிக்காவிற்கு ஜே.டி. கெண்ட் என்று இருவரையும் ஒப்பிட்டு மகிழ்ந்தனர் உலக ஹோமியோபதி மருத்துவர்கள்.

 

 இவ்வாறு ஹோமியோபதிக்கு அரும்பணியாற்றிய அம்மேதை கி.பி. 1931 ஆம் ஆண்டு நவம்பர் 24 ந்தேதி இவ்வுலகை விட்டுப் பிரிந்தார். இவரது மறைவை இங்கிலாந்தில் மட்டுமல்ல அகில உலகிலும் வாழ்ந்த ஹோமியோபதியர்களாலும் தாங்கிக் கொள்ள முடியவில்லை. மருத்துவர் எப்.வுட்ஸ் ,” THE HOMIYOPATHIC WORLD”  ஜனவரி 1932 இதழில்,  “உலகின் சிறப்பு வாய்ந்த பல ஹோமியோபதி மருத்துவர்கள் உள்ளனர். இருந்தாலும் ஜே.எச்.கிளார்க்கின் மறைவு ஹோமியோபதி உலகை இருள் சூழ வைத்துள்ளது உண்மை" என்று புகழாரம் சூட்டியுள்ளார். ஹோமியோபதி இருக்கும் வரை மருத்துவர் கிளார்க்கின் சேவையையும் , அவர் விட்டுச் சென்றுள்ள நூல்களையும் யாராலும் மறக்க முடியாது. ஒவ்வொரு முறையும் நோயாளிக்கு மருந்தளிக்கும் போது , அந்த இனிப்பான உருண்டைகளுக்கிடையே அம்மருந்தைப்பற்றி மருத்துவர் ஜே.எச்.கிளார்க் எழுதிவிட்டு சென்றுள்ள வார்த்தைகளே ஞாபகத்திற்கு வரும்.

 

 (ஹோமியோ தோழன் ஜூன் 2007 எழுதப்பட்ட எனது கட்டுரை )