தனித்துவப்படுத்துதல் (தனிமனிதமயமாக்குதல் அல்லது தனிப்படுத்துதல்).

 

தனித்துவப்படுத்துதல் (தனிமனிதமயமாக்குதல் அல்லது தனிப்படுத்துதல்)-

INDIVIDUALIZATION

ஆக்கம்: சு.கருப்பையா, மதுரை.

 

ஹோமியோபதி மருத்துவத்தில் ஒத்த மருந்தைத் தேர்வு செய்வதற்கு ஒப்பீடு (Comparison) , தனித்துவப்படுத்துதல் [(தனிமனிதமயமாக்குதல் அல்லது தனிப்படுத்துதல்) ( Individualization ) ] மற்றும் மிகவும் ஒத்த விஷயங்களின் தன்மையில் உள்ள வேறுபாடு ( Difference) ஆகியவை கவனமாகக் கருத்தில் எடுத்துக் கொள்ள வேண்டிய நுட்பங்கள் ஆகும்.  ஒவ்வொரு ஹோமியோபதி மருத்துவரும் , ஒரு நோயாளியை கட்டாயம் தனித்துவப்படுத்திப் பார்க்கவேண்டும் , கட்டாயம் மற்றவர்களிடமிருந்து வேறுபடுத்திப்  பார்க்கவும் வேண்டும். 

 தனித்துவப்படுத்துதல் என்பதன் கோட்பாடு:

 மனிதர்களில் இரண்டு நபர்கள் ஒரே மாதிரியாக இருப்பதில்லை, ஒவ்வொரு நபரும் அவரது புத்திசாலித்தனம், விருப்பு, வெறுப்புகள் போன்றவற்றில் மற்றவரிடமிருந்து வேறுபடுகிறார். இருப்பினும் அவரின்  தலைமைப்பண்புகள்  மற்றும் தனித்தன்மைகளின் கலவையாக  இருக்கிறார். எனவே, அவர்கள் பொதுவான ஒரு  நோயால் தாக்கப்படும் போது , ஒரே மாதிரியாக இருக்க முடியாது, மேலும் அவர் அந்த நோய் நிலையில் இருக்கும் பொதுவான அறிகுறிகளை , குறிப்பிடப்பட்ட தனிப்பட்ட மற்றும் வேறுபட்ட சிறப்பியல்பு அறிகுறிகளுடன் வெளிப்படுத்துகிறார். ஹோமியோபதி மருத்துவச் சிகிச்சையில், பொதுவான தலைமையான அறிகுறிகளைக் காட்டிலும் மற்றவற்றிலிருந்து வேறுபடுத்தும் குறிப்பிடப்பட்ட மற்றும் தனிப்பட்ட   சிறப்பியல்பு அறிகுறிகள் மிகவும் அவசியம்.

 இது பற்றி ஹானிமன் மணிமொழி- §  82  இல் “ஒவ்வொரு நாட்பட்ட நோய் வரலாற்றிலும் (சொறி- சிரங்கு நோய்மூலம்) , அங்கே நலப்படுத்துவதற்காக அழைக்கப்படும் ஹோமியோபதி மருத்துவரின் கடமையாக இருப்பது , நோய்குறிகளை நன்கு ஆராய்ந்து , உறுதிப்படுத்திக் கொள்ளத் தக்கவாறு உள்ள குறிகளையும் மற்றும் தனிச் சிறப்பு பண்பு குறிகளையும் மிகுந்த கவனத்துடன் மனதில் உள்வாங்கிக் கொள்வதும் ஹோமியோபதி மருந்துகளை அறிந்து கொள்வதும் இன்றியமையாததாகும். மிகக் கண்டிப்பான முறையில் நோய்ப் பாதிப்பிற்குள்ளான ஒவ்வொரு நோயாளரையும் தனித்தனியாக (தனித்துவப்படுத்துதல்) சிகிச்சை செய்தாலன்றி இந்த நோயையும் அல்லது பிற நோய்களையும் உண்மையாக நலப்படுத்த முடியாது- இது போன்று நோய்களை ஆய்வு செய்யும் போது திடீரென்று தாக்கி  தோன்றி மறையும் தீவிர நோய்களையும் , நீண்ட காலமாக தொடர்ந்து தாக்கி வரும் நாட்பட்ட நோய்களையும் வேறுபடுத்திப் பார்த்து நன்கு புரிந்து கொள்ள வேண்டும்.” என்று தெளிவாக குறிப்பிடுகிறார்.

 மருந்துகளின் மட்டத்தில் தனித்துவப்படுத்துதல்:

 உதாரணமாக, சீகேல் (Secale) மற்றும் ஆர்சனிக்கம் ஆல்பம் (Arsenicum album ) ஆகிய இரண்டு மருந்துகளை எடுத்துக் கொள்ளுங்கள்; அவர்கள் இருவரும் குளிர்ச்சியாக இருக்கிறார்கள், ஆனால் சீகேல் நோயாளி , தான் போர்த்தியுள்ள அனைத்து ஆடைகளையும் அகற்றிக் கொள்ள  விரும்புகிறார் மற்றும்  குளிர்ந்த காற்றை விரும்புகிறார், ஆனால்,  ஆர்சனிக்கம் ஆல்பம் நோயாளி எல்லாம் சூடாக இருக்க வேண்டும் என்று விரும்புகிறார்.   இரண்டு மருந்துகளும் ஒரே நேரத்தில் பிரித்துப்பார்க்கப்படுகின்றன.; அவை பொதுவான நிலைக்கு முற்றிலும் வேறுபட்டவையாக இருக்கின்றன, அதே நேரத்தில் குறிப்பிட்ட விவரங்களுக்கு முற்றிலும் ஒத்த தன்மையுடன் இருக்கின்றன. வெறும் புத்தகத்தை மட்டும் படித்து அதில் இருக்கும் அறிகுறிகளை மட்டுமே தேடுபவர் சீகேல் (SECALE) மற்றும் ஆர்சனிக்கம் ஆல்பம் (ARSENICUM album ) இடையே எந்த வித்தியாசத்தையும் காண மாட்டார்.

 நோயின் மட்டத்தில் தனித்துவப்படுத்துதல்:

 குடல்தாங்குசவ்வு அழற்சி ( PERITONITIS) பாதிப்பினால் நோய்ப் படுக்கையில் இருக்கும் ஒரு நோயாளியை  நீங்கள் பார்க்கச் செல்லும்போது   ,  அவருக்கு வயிறு விரிவடைந்து, நோயாளி அமைதியற்றவராக இருப்பதைக் காண்பீர்கள்; அவர் அடிக்கடி இரத்தத்தை வாந்தி எடுப்பதையும், ஆசனவாயிலிருந்து இரத்தம் வெளியேறுவதையும் நீங்கள் காண்பீர்கள்; விரிந்த வயிறு, தணியாத தாகம், உலர்ந்த,  சிவந்த நாக்கு, மின்னல் போன்ற துடிப்புடன் விரிந்த வயிறு பயங்கரமாக எரிவதைக் காண்பீர்கள். சரி, ஆர்சனிக்கம் ஆல்பம் மற்றும் சீகேல் ஆகிய இரண்டு மருந்துகளிலும் இவை அனைத்தும் சமமாக உள்ளன;  இரண்டு மருந்துகளும் உயர்தரத்தில் இந்த அறிகுறிகளைக்  கொண்டுள்ளன; ஆனால் சீகேல்  மருந்தை குறிப்பிடும் போது , அவர் அனைத்து துணிமணிகளையும் அகற்றவும்  வேண்டும், குளிர்ச்சியாக இருக்கவும் விரும்புவார், குளிர்ந்த ஒத்தடங்களை அல்லது   பயன்பாடுகளை விரும்புவார், இருக்கும் அறையின் ஜன்னல்கள் திறந்திருக்க வேண்டும்  ; அவரால் வெப்பத்தை பொறுத்துக் கொள்ள முடியாது, சூடான அறை அவரது நோய் நிலையை மோசமாக்குகிறது. அத்தகைய சந்தர்ப்பத்தில் ஆர்சனிக்கம் ஆல்பம் மருந்து சுட்டிக்காட்டப்பட்டால், அவர் தனது உடல் சூடாக மூடப்பட்டிருக்க விரும்புகிறார், ஜூலை மாதத்தில் கூட (வெப்ப மாதங்களில் ) , சூடான உணவு மற்றும் சூடான பானங்களை விரும்புகிறார். நமது முழு மருந்தியல் களஞ்சியமும் இந்த விஷயங்களால் நிரம்பியுள்ளது மற்றும் இந்த வகையான தனித்துவப்படுத்துதலை அடிப்படையாகக் கொண்டுள்ளது.

 அதே போல்,  அமைதியின்மை ( RESTLESSNESS) என்ற மனக்குறியில்  நாம் ஆர்சனிக்கம் ஆல்பம் (ARS), அகோனைட் (ACON) மற்றும் ரஸ் டாக்ஸ் (RHUS-T) ஆகிய மருந்துகளைப் பற்றி நினைக்கிறோம். இந்த மூன்று மருந்துகளும் இந்த அறிகுறியைக் கொண்டிருந்தாலும், அமைதியின்மையை வெளிப்படுத்துவது தனித்துவமானது. ஆர்சனிக்கம் ஆல்பம் அமைதியின்மை ( RESTLESSNESS) முற்றிலும் வலுவிழந்தும் ( EXTREME PROSTRATION)  மற்றும் குறைந்த உயிர்ச்சக்தியுடன் ( REDUCED VITALITY) உள்ளது, இது எந்த அசைவினாலும்  நிவாரணம் பெறாது. அதே சமயம் ரஸ் டாக்ஸ் அமைதியின்மை அதன் மூட்டு வலிகளால் ஏற்படுகிறது, இது அவரை தொடர்ந்து நகர வைக்கிறது, மேலும் இந்த இயக்கம் அவரை தற்காலிகமாக விடுவிக்கிறது. அகோனைட், ஆர்சனிக்கம் ஆல்பம் இயக்கத்தால் நிவாரணம் தராது; ஆனால் அது மரண பயம் கொண்டது. இவ்வாறு மருந்துகளின் தனித்துவம் பற்றி அறிந்து கொள்ளவேண்டும்.

 தலைமைக்குறிகளின் பங்கு :

 ஒரு நோயாளியின் தலைமைக்குறிகள்  ( GENERALS)  இல்லாமல்  எந்த மனிதனும் ஹோமியோபதியைப் பயிற்சி செய்ய முடியாது, ஏனென்றால் இவை இல்லாமல் எந்த மனிதனும் தனித்துவம் மற்றும் வேறுபாடுகளைக் காண முடியாது.  அனைத்து விவரங்களையும் சேகரித்த பிறகு, ஒரு வலுவான தலைமைக்குறி ஒரு மருந்தை நிராகரித்து , ஒரு மருந்தை தேர்வு செய்ய உதவுகிறது. மருத்துவர்கள், பொதுவாக இரண்டு அறிகுறிகளை அல்லது இரண்டு மருந்துகளுக்கும் பொதுவாக உள்ள  ஒரு அறிகுறியைத் தேர்ந்தெடுத்து கொள்கிறார்கள் என்று வைத்துக் கொள்வோம் , "இப்போது, இந்த இரண்டு மருந்துகளுக்கும் ஒரே அறிகுறி இருக்கிறது!, நீங்கள் அவர்களுக்கு எப்படி மருந்து கொடுக்கப்  போகிறீர்கள்?  சரி, நீங்கள் மருந்தியல் களஞ்சியத்தின் அறிவுடன், தனித்துவப்படுத்தும் கலையை அறிந்திருந்தால், தலைமைக்குறிகளை எவ்வாறு பெறுவது என்பதை நீங்கள் உடனடியாகப் பார்ப்பீர்கள்; ஒரு மருந்தின் தலைமைக்குறிகள்   இப்படி இருக்கும்; மற்றொரு மருந்தின் தலைமைக்குறிகள் அப்படி இருக்கும் . எனவே, இந்த இரண்டு மருந்துகளும்  எந்த சம அளவிலும் ஒரே அறிகுறியைக் கொண்டிருக்கும் போது, இந்த மருந்துகளில் ஒன்றை அவர்களின் உடலமைப்பிற்கு  ஏற்றதாக வேறுபடுத்தி அறிய இது உங்களை அனுமதிக்கும் .  பல சமயங்களில் ஒரு நோயாளி மிகவும் விசித்திரமான மற்றும் அரிதான அறிகுறிகளுடன் வருவார், அவற்றை எந்த மருந்திலும் உங்களால் கண்டுபிடிக்க முடியாது. நீங்கள் அந்த நோயாளியை முழுமையாக ஆராய்ந்து ,  நம்மிடமுள்ள அனைத்து மருந்துகளிலும் எந்த மருந்து நோயாளிக்கு மிகவும் ஒத்திருக்கிறது என்பதைப் பார்க்க வேண்டும். ஹோமியோபதி மருத்துவர், ஆரம்பம் முதல் இறுதி வரை, அந்த நோயாளியை ஆராய வேண்டும். குறிப்பாக , ஒரு நோயாளி உங்கள் அறைக்குள் நுழையும் போதே உங்களுடைய ஆய்வு தொடங்கி விடுகிறது.

 நோயாளியை முதல்முறையாகப் பார்த்தவுடனேயே அவரின்  நடை, உடை அணியும் விதம், தோரணை, அவர் பேசும் விதம், முகபாவனைகள் போன்ற அனைத்தும் அவரின்  தனிப்பட்ட குணம் மற்றும் உடலமைப்பு  பற்றிய குறிப்பிடத்தக்க தகவல்களைத் தெரிவிக்கின்றன, அவை மருந்தைக் கண்டறிதலுக்கு முக்கியமானவை ஆகும். நோயாளியின் தோற்றம் ஒரு பெரிய விஷயத்தை சொல்ல முடியும்  என்பதை கீழ்காணும் உதாரணங்கள் மூலம் அறிந்து கொள்ளலாம்;

 கருப்பு முடி கொண்ட மெல்லிய,  மென்மையான பெண்ணுக்கு கல்கேரியா கார்ப் ( CALC) தேவைப்படாது.

 மருத்துவரின் வரவேற்பறையில் சற்று நேரம்  காத்திருந்து எரிச்சலுடன் வரும் நோயாளிகள் ஆர்சனிக்கம் ஆல்பம் ( ARS), நேட்ரம் முரியாட்டிகம் ( NAT-M) , மெர்குரியஸ் (MERC) அல்லது நக்ஸ்வாமிகாவாக ( NUX-V) இருக்கலாம்.

 ஒரு நபர் தன்னால் இயன்றவரை பின் வரிசையில் உட்கார்ந்து கொள்பவர், அல்லது அவருக்கான நாற்காலியை விட தொலைவில் உள்ள நாற்காலியைத் தேர்ந்தெடுப்பவர் எச்சரிக்கையான வகைகளில் ஒன்றாக இருக்கலாம்.

 இதேபோல் நாற்காலியில் முன்னோக்கி சாய்ந்து, அல்லது அதை முன்னோக்கி நகர்த்தும் ஒருவர், ஒருவேளை உற்சாகமான வகைகளில் ஒன்றைச் சேர்ந்தவர், குறிப்பாக , அவர் பாஸ்பரஸ் ( PHOS) .

 ஆடம்பரமாக உடையணிந்த நோயாளிக்கு அர்ஜென்டம் நைட்ரிக்கம் ( ARG-N) , மெடோரினம் (MED) , பாஸ்பரஸ் (PHOS)  அல்லது சல்பர் ( SULPH) தேவைப்படும்.

 சில நபர்கள்  கருப்பு நிற ஆடையை  அணிய வாய்ப்பு அதிகம், குறிப்பாக இக்னேஷியா (IGN) , நேட்ரம் முரியாட்டிகம்  ( NAT-M) மற்றும் செபியா (SEP). 

 அழுக்கு அல்லது ஒழுங்கற்ற ஆடை அணிபவர்களுக்கு  பாரிடா, மெர்குரியஸ் மற்றும் சல்பர் ஆகிய மருந்துகளின் தேவையைக் குறிக்கிறது.

 மாறாக, ஆண்தன்மையை வெளிப்படுத்தும் உடையை அணியும் பெண்ணை இக்னேஷியா (IGN) , நேட்ரம் முரியாட்டிகம் அல்லது நக்ஸ்வாமிகா என வகைப்படுத்தலாம்.

 அதே போல் நோயாளிகளிடம் வெளிப்படும் சில தனித்துவமான பண்புகளும் நமக்கு பெரிதும் உதவும். எடுத்துக்காட்டாக;

 சில நோயாளிகள் தங்கள் அறிகுறிகளை மிகத் துல்லியமாகப் பட்டியலிடுகிறார்கள். அவர்களுக்குரிய மருந்தாக ஆர்சனிக்கம் ஆல்பம், கல்கேரியா கார்ப் , பாஸ்பரஸ், நேட்ரம் முரியாட்டிகம் போன்றவைகள் இருக்கின்றன. 

 மனவாட்ட நோயிற்கு உள்ளானவர்கள் அவர்களின் அறிகுறிகளை மிகைப்படுத்த முனைகிறார்கள் . அவர்களுக்கு உரிய மருந்து இக்னேஷியா, சல்பர் மற்றும் பாஸ்பரஸ்.

 கோபத்தைத் தூண்டும் சூழ்நிலைகள் நோயாளிகளை வேறுபடுத்திப் பார்க்க உதவுகின்றன: – ஆர்சனிக்கம் ஆல்பம் அசுத்தத்தால் கோபமடை கிறார்;  நிராகரிப்பு அல்லது விமர்சனம் மூலம் இக்னேஷியா  கோபமடைகிறார்  .

 நக்ஸ் வாமிகா மற்றும் சல்பர் நபர்கள்  இயற்கையாகவே தலைவர்கள் ஆவார்கள், இவர்கள் தங்கள் திட்டங்களுக்குத் தடையாக வருபவர்களால் கோபப்படுகிறார்கள்.

 செபியா (SEP) தனக்கு உத்தரவு கொடுக்க முயற்சிக்கும் அல்லது தன்னை புறக்கணிக்கும் ஆண்களிடம் வெறுப்படைகிறாள்.

 டியூபர்குலினம் (TUB)  மற்றும் லாக்கஸிஸ் ( LACH) இரண்டும் சுதந்திரத்தை விரும்புகின்றன மற்றும் எந்த வகையிலும் கட்டுப்படுத்தப்படுவதை விரும்பாது .

 ஒரு நபர் தேர்ந்தெடுக்கும் தொழில்  பெரிய விஷயத்தை வெளிப்படுத்த முனைகிறது. நக்ஸ் வாமிகா மற்றும் சல்பர் ஆகியவை நீண்ட காலத்திற்கு கீழ்நிலை ஊழியராக இருக்க வாய்ப்பில்லை.  மற்றும் அவர்கள் சுயதொழில் செய்வார்கள்.

 ஆர்சனிக்கம் ஆல்பம் மற்றும் நேட்ரம் முரியாட்டிகம் ஆளுமைகள் நல்ல நிர்வாகத்  திறன்களைக் கொண்டுள்ளனர் மற்றும் நிர்வாக பதவிகளில் காணப்படுவார்கள்.

 லைகோபோடியம் ( LYC) பெரும்பாலும் அறிவியல் மற்றும் கணினி நிலைகளிலும், விற்பனையாளர் வேலைகளிலும் மற்றும் அவர்களது சொந்த வணிகங்களிலும் காணப்படுவார்கள்.  

 இவ்வாறு நோயாளிகளிடமிருந்து வெளிப்படும் அல்லது அறியப்படும் தனிப் பண்புகளிலிருந்து அந்த நோயாளியை நாம் தனித்துவப்படுத்த முடியும்.

 மாற்றீடு ( SUBSTITUTION) இருக்க முடியாது:

 மணிமொழி 118 இவ்வாறு கூறுகிறது,  " ஒவ்வொரு மருந்தும் மனித உடலின்  மீது விசித்திரமான செயல்களை வெளிப்படுத்துகின்றன, ஒரு மருந்தின் செயல்பாட்டை போன்று  அதே முறையில்   வேறு வகையான மருந்து பொருளால் ஏற்படுத்த முடிவதில்லை." மாற்றீடு ( SUBSTITUTION) இருக்க முடியாது என்பதைக் காட்டும் ஒரு கோட்பாட்டின் ஆரம்பம் அது. மனிதன் எவ்வளவுதான் படித்தாலும் வேறுபாடு பார்க்க முடியாத அளவுக்குக் குழப்பமான நோய் வரலாறுகள் உண்டு; ஆனால், ஒன்றை நினைவில் வையுங்கள், தெரிந்தோ தெரியாமலோ, ஒரு நோயாளிக்கு  ஒரு மருந்து தான்  தேவைப்படுகிறது.  மேலும் அதற்கு மாற்றீடு இல்லை, ஏனெனில் அந்த மருந்து மற்ற எல்லா மருந்துகளிலிருந்தும் வேறுபடுகிறது, அந்த நபர் மற்ற எல்லா நபர்களிடமிருந்தும் வேறுபடுகிறார்.  ஹோமியோபதி  மருத்துவத்தில் ஒரு மருந்திற்குப் பதிலாக வேறொரு மருந்தை மாற்ற முடியாது, ஒன்று மற்றொன்றைப் போல் சிறந்ததாக இருக்க முடியாது.

 இந்த விஷயத்துடன் நாம் அடுத்துச்  செல்லும்போது, ​​ மணிமொழி  122 இல், ஹானிமன் " இந்த மருத்துவக்கலையின் (ஹோமியோபதி ) முழு  துல்லியத்தன்மையையும், மனிதகுலத்தின் அனைத்து எதிர்கால தலைமுறையினரின் வாழ்வு வளத்தையும்  சார்ந்துள்ள இந்த மருந்துப் பரிசோதனைகளின் போது - நன்கு அறியப்பட்ட, தூய்மையான , நேர்மையான மற்றும் ஆற்றல் உடையவை என்று நம்மால் முழுமையாக உறுதி செய்யப்பட்ட மருந்துகளைத் தவிர வேறு எந்த மருந்துகளையும் பயன்படுத்தக்கூடாது " என்று கூறுகிறார். மேலும் மருந்துகளின் தூய்மை மிகவும் முக்கியம், நிரூபிக்கப்பட்ட மருந்துகள் மாற்றப்படாமல் பாதுகாக்கப்பட வேண்டும் மற்றும் அவற்றின் முழு ஆற்றலையும் தக்க வைத்திருக்க வேண்டும். இப்போது, மருந்துகள் நிரூபிக்கப்பட்டதைப் போலவே, முடிந்தவரை அதே பொருட்களை நீங்கள் பயன்படுத்த வேண்டும் என்பது முக்கியம்.  மருந்துகளின் வீரியத்தைப் பொறுத்தவரை மருத்துவர் ஃபின்கே ( FINCKE) மற்றும் பிறரால் உருவாக்கப்பட்ட உயர்ந்த வீரியங்களை நாம் இங்கு பயன்படுத்துகிறோம்.  மருந்துகளை நிரூபணம் செய்யும் போது ஒரே மாதிரியான பொருட்கள் ஏராளமான எண்ணிக்கைகளில்  உள்ளன. அவற்றின் மூலப்பொருள்கள் மாறாமல் இருப்பது முக்கியம். நிரூபணம் செய்யப்பட்ட அதே பெயரைக் கொண்ட ஒரு தாவரம், வெவ்வேறு காலநிலை மற்றும் வேறு மண்ணில் வளர்க்கப்படுகிறது, ஆனால் அவற்றைப்  பயன்படுத்தப்படக்கூடாது. முதலில் நிரூபிக்கப்பட்ட ஒன்றையே வாங்க வேண்டும். ஹெரிங் நிரூபித்த மருந்துகளை வாங்கியபோது ஃபின்கே இதை அங்கீகரித்தார். ஹெரிங் நிரூபித்த அதே லாக்கஸிஸ் (Lachesis) மருந்து  எங்களிடம் உள்ளது. ஹெரிங்கின் சொந்தப் பெயரால் குறிக்கப்பட்ட ஒரு சிறிய குப்பியில் நாங்கள்  பாதுகாத்து வரும் அசலான ( மூலமுதலான)  லாக்கசஸின் மாதிரி எங்களிடம் இருக்கிறது என்று அவர் குறிப்பிடுகிறார். ஆகவே, நாம் பயன்படுத்தும்  மருந்து பற்றி நமக்கு நன்கு தெரிந்திருக்க வேண்டும்; அதன் வரலாறு மற்றும் அனைத்து விவரங்கள் நன்கு அறியப்பட வேண்டும் மற்றும் அவற்றின் வீரியப்படுத்துதல் பற்றிய கேள்வி கணக்கில் எடுத்துக்கொள்ளப்பட வேண்டும், அம்மருந்துகள் கடந்து வந்த வெவ்வேறு நபர்கள்; வீரியப்படுத்தப்பட்ட சிறிய விவரங்கள் அனைத்தும் நன்கு தெரிந்திருக்க வேண்டும். நீங்கள் இதில் கவனக்குறைவாக இருக்கக்கூடாது.  முடிந்தால், மருந்துகள் தயாரிக்கப்படும்  தலைமையகத்திற்குச் சென்று உங்களுக்குத் தேவையான வீரியங்களைப் பெறுங்கள்.

 ஹானிமன் மணிமொழி 144 இல் எழுதுகிறார்: " அத்தகைய ஒரு மருந்தியல் களஞ்சியத்திலிருந்து  , ஊகத்துக்கிடமான  எல்லாவற்றையும், வெறும் வலியுறுத்தல் அல்லது கற்பனையான  அனைத்தையும்  கண்டிப்பாக விலக்கப்பட வேண்டும்; அனைத்தும்  இயற்கையின் தூய மொழியில்  , கவனமாகவும் நேர்மையாகவும் வினவப்பட்டதாக இருக்க  வேண்டும்." அத்தகைய ஆரோக்கியமான மற்றும் தூய்மையான மற்றும் நேர்மையான கூர்ந்த கவனிப்புகளுடன் நிரூபிப்பதன் மூலம் மருந்தியல் களஞ்சியத்தை உருவாக்கி, கட்டமைத்து நிறுவியுள்ளோம். மேலும் மணிமொழி 145 இல்: " உண்மையாகவே,  மனிதனின் ஆரோக்கியத்தில்   மாற்றங்களை  ஏற்படுத்தும் மருந்துகளின் தூய செயல்பாட்டினை   அறிந்திருக்கும் போது மட்டுமே , நம்மிடையே இருக்கும் மிகவும் போதுமான அளவிலான மருந்துக் களஞ்சியத்திலிருந்து ஒரு ஹோமியோபதி மருந்தை கண்டுபிடிக்கும் நிலையில் நாம் இருக்க முடியும். இந்த மருந்து இயற்கையின் ஒவ்வொரு எல்லையற்ற எண்ணிலடங்கா நோய்க்கூறுகளுக்கும்  , உலகில் உள்ள ஒவ்வொரு நோய்க்கும் ஏற்ற ஒரு சரியான செயற்கையான ( நலம் தரக்கூடிய) நோய்க்கூறுகளை கொண்டதாக இருக்கும்" என்றும் குறிப்பிடுகிறார்.  தற்சமயம், முழுமையாக வளர்ந்த நோய்க்கு அதன் ஒத்த தன்மையும், அதற்கான மருந்தும் மற்றும் சிகிச்சையும், நமது மருந்தியல் களஞ்சியத்தில்  இல்லை என்பது அரிதாகவே கண்டறியப்படுகிறது. வளர்ச்சியடையாத கலப்பு நோய்கள் தான் நம்மைப் புதிராக ஆக்குகின்றன என்று மருத்துவர் J.T. கெண்ட் குறிப்பிடுகிறார்.  

 முடிவுரை:

 மேற்கூறியவற்றிலிருந்து தனித்துவப்படுத்துதல் எவ்வளவு முக்கியமானது என்பதை தெளிவாக அறிந்து கொள்ள முடியும். இந்த செயல்முறையில் நாம் தோல்வியுற்றால் நோயாளியை நலமாக்க இயலாது; அது சம்பந்தப்பட்ட ஹோமியோபதி மருத்துவரின் தோல்வியாக இருக்குமேயொழிய ஹோமியோபதி மருத்துவத்தின் தோல்வி ஆகாது. எனவே, ஹோமியோபதியின் வலுவான அடிப்படையாக இருப்பது  நோயாளிகளை புரிந்து கொள்வது மருந்துகளை புரிந்து கொள்வது மற்றும் தனித்துவப்படுத்துவது ஆகும்

 

Source:  1. LECTURES ON HOMEOPATHIC PHILOSOPHY-BY dR.J.T.KENT.

2. a GUIDE TO ORGANON OF MEDICINE-BY DR.M.N.DAS